ብዛዕባ ደራሲ

ኣባ ይስሃቕ ገብረኢየሱሰ፡ ከም ፈላሲ ዓቢ ናይ ሃይማኖት ኣቦ፣ ከም ንፍትሒ ከይተሓለሉ ዝቃለሱ ተጋዳላይ፣ ከም ተመራማራይን ናይ ስነ ጥበብ መምህርን ዘገልግሉ፣ ናይ ዘመን'ና ዓቢ ህያብ ምዃኖም ሓያሎ ክኢላታት ስነ-ጥበብ ይምስክሩ። ኣባ ይስሃቕ፡ ብዘይካ’ቲ ኣብ ካልእ ዓውድታት ዘበርከትዎ ሙያ ኣብ ታሪኽ፡ ስነ-ባህሊ፡ ስነ-ሰብ፡ ስነ-ጽሑፍ፡ ስነ-ጥንቲ፡ ስነ-ፊደልን ቋንቋን፡ ብሓፈሽኡ ንባህልን መንነትን ሃገሮምን ህዝቦምን ዘጉልሕ ልዕሊ 40 መጽሓፍቲ ዘበርከቱ ዘይሕለሉ ኣቦ ኢዮም።

ማርቆሳይ ዝተሓላለኽ ጽባቐን ብድሆን ማሕበራዊ ናብራን መስተንክራዊ ኣጋጣሚታትን ዝመልኣ ልበ-ወለዳዊት መጽሓፍ እያ። ባህላዊ መዛሙራት፣ ድርፍታት መርዓን ጥምቀት፣ ናይ ሓዘን መልቀስ፣ ትምህርታዊ ግጥምታትን ጽውጽዋያትን ምስቲ ዛንታ ብዝዛመድን ብዘዘናግዕን መልኽዕ ተጻሒፉ ንረኽቦ። እቲ ዝዓበየን ታሪኻዊት ዝገብራ ግን ኣብ ኣመራርጻ ቃላት፣ ኣገላልጻ ሓሳባት፣ ንጹርነት ትርእዮታት፣ ናይ ኣባ ይስሃቕ ምልከት ቋንቋ ትግርኛን ዓሚቕ ፍልጠት ባህልን ልምድን ሕብረተሰብና እዩ። ኣብነት ናይቲ ክብጻሕን ናብ ዝቕጽል ወለዶ ክመሓላለፍን ዝግባእ ስነ ጽሑፋዊ ደረጃ ትግርኛ ንኽትገልጸልና ብተገዳስነት ከነንብባን ከነጽንዓን ይግብእ።